Category Archives: Fjell

Les informasjonshefte om Nye Øygarden kommune!

I sist veke fekk innbyggjarane i Sund, Fjell og Øygarden eit informasjonshefte frå Nye Øygarden i postkassen.

I dette heftet kan du lesa om arbeidet med å byggja den nye kommunen. Det er intervju med leiar av fellesnemnda, Børge Haugetun, og prosjektrådmann, Rune Lid, som tek over som rådmann i Nye Øygarden kommune 1. januar 2020. Det er presentasjon av Øygardsgenseren, prosjektorganiseringa, den politiske organiseringa og mykje anna.

Informasjonsheftet: Vi byggjer Nye Øygarden kommune

Dersom du ikkje har fått informasjonsheftet i postkassen,  kontakt oss slik at vi kan senda det til deg.

Her er kommunalsjefen for Organisasjon og digitalisering

Sissel Iren Nesse (50) er tilsett som kommunalsjef for Organisasjon og digitalisering i Nye Øygarden kommune. Dermed er fire av kommunalsjefar for den nye kommunen avklart.

Sissel Iren Nesse er i dag einingsleiar for løns- og rekneskapssenteret i Bergen kommune. Ho tek til i den nye stillinga den 7. mars.

– Eg er oppvaksen på Sotra, og eg ønskjer å vera med på denne reisa. For meg er det eit ønske at eg kan vera med på å utvikla framtidsretta tenester der digitalisering og fornying er sentralt, seier Nesse.

Den nytilsette kommunalsjefen har tidlegare mellom anna vore regiondirektør i Accountor AS og seksjonssjef i Helse Bergen. Sissel Iren Nesse har master i leiing i offentleg sektor. Ho er autorisert rekneskapsførar og er diplomøkonom frå Handelshøyskolen BI, Bergen.

Ho har stor tru på framtida for Nye Øygarden kommune.

– Ved å stå samla i arbeidet med å byggja den nye kommunen, vert vi ein sterk region, seier Sissel Iren Nesse.

Prosjektrådmann Rune Lid er svært glad for at fire kommunalsjefar no er tilsette.

– Etter kvart vil desse som planlagt gå inn som leiarar av hovudprosjektgruppene. Det er også viktig at eg no får etablert eit leiarteam som skal byggja den nye kommunen. Det er mykje kompetanse og erfaring i dette leiarteamet, seier Lid.

Dei andre kandidatane som har takka ja til å vera kommunalsjef i Nye Øygarden kommune er Line Barmen (Helse og velferd), Anne-Merete Vabø Haugane (Oppvekst) og Råmund Skjold (Kultur og samfunn).

Stillinga som kommunalsjef for Økonomi er ikkje på plass og skal lysast ut eksternt.

Tekst og bilete: Vigleik Brekke

Øygardsgenseren – Stem på din favoritt!

Ordførarane ønskjer at den nye storkommunen, Øygarden kommune, skal få sin eiga og nydesigna strikkejakke eller genser der mønster eller fargar/strikketeknikk skal symbolisera kystkommunane her vest.

Kommunane her vest har mykje til felles allereie før vi vert ein samanslått kommune. Alt frå felles tradisjonar og tidlegare kystkulturhistorie til nyare tider med olje, innovasjon, havbruk og fiske.

Ein ny strikkejakke eller genser kan symbolisera kulturarven vår – ny og gamal – og ta oss med inn i framtida.

Innsendte forslag

I strikkekonkurransen er det kome inn seks forslag:

Klikk på bilete for å sjå det i full storleik.

Informasjon om dei ulike alternativa:

  1. Mønster og fargar både symboliserer og vert assosiert med den felles identiteten i dei tre kommunane og tilhøyrsle som kystkommunar med maritime røter. Fortid, notid og framtid vert knytt saman. Gensaren har ein stram komposisjon med elementer av klassisk design og nyvinning.
  2. Inspirert av kystkulturen – stein, hav og fisk. Motivet på genseren er henta ut frå gamle kommunevåpen i tillegg til nytt. Dei gamle kommunevåpena er no historie, derfor er motiva bak på ryggen. Dei tre motiva framme viser at tre no er eitt.
  3. Fargar: Himmel, hav, berg, knausar og lyngheiar. Her er vrangbord laga i fletter: Vi treng å bli fletta saman som kommunar og einskildpersonar. Dei ulike mønstera skal bli sett som abstrakte. Tradisjon; henta frå tidlegare sotragenserar, sjølve landskapet, rikt pynta med dei nydelege fargane i lyngen. Bølger, skyer, knausar og berg. Bruene – mellom øyane her ute og bruer som må bli bygd mellom alle oss som bur her.
  4. Blåfargen symboliserer sjøen og himmelen. Gråfargen viser svaberga. Med raudfargen på nausta kjenner vi på det ramsalte kystlandskapet og kystkulturen. Fyrtårnet i vest – kommunevåpenet kan brukast som lomme og plasserast der ein ønskjer.
  5. Havet og dønningane, som rullar og glir i kvarandre. Dag etter dag, år etter år, generasjonar etter generasjonar. Dei dannar eit “evigheitsmønster”, og lusene i kofta er sett saman av tre prikkar som dannar ei eining. EHer er en prikk for kvar kommune som estetisk sett ser ut som eitt.
  6. Fargane er valde etter inspirasjon frå øygardsnaturen. Åtteblaroser går igjen i mange tekstilar i vårt  område. Borda med kors symboliserer den religiøse tanken.

Utstilling

Forslaga vert utstilte desse dagane på biblioteka i Sund, Fjell og Øygarden kommunar:

  • Fjell folkeboksamling 22. -29. oktober
  • Sund folkeboksamling 30. oktober – 5. november
  • Øygarden folkeboksamling 6. – 14. november

Stem på din favoritt!

Du kan stemma ved bibliotekene i kommunen, eller elektronisk her innan onsdag 14. november 2018.

Stem her

Vinnar vert kunngjort på julemessa til Sotra Husflidslag laurdag 17. november 2018.

Prioriterer godt arbeidsmiljø

Tilsette i Helsestasjon- og skulehelsetenesta i dei tre kommunane som skal slå seg saman, har hatt felles samling der ein har hatt fokus på arbeidsmiljø. Det arbeider ein solid gjeng både i Sund , Fjell og Øygarden.

Tilsette i Helsestasjon- og skulehelsetenesta i dei tre kommunane

Hovudoppgåva vår er å driva med førebyggjande helsearbeid. Det er ein stor gjeng med  helsesøstrer, jordmødrer, legar, miljøarbeidar, familierettleiar og sekretærar som står på for at innbyggjarane i kommunane skal få rettleiing og hjelp når dei treng det.

Vi er vane med å vera ute i god tid og førebyggja. No har vi hatt fokus på eige arbeidsmiljø i to dagar. Det var svært lærerikt og interessant. For at vi skal kunne hjelpa andre må vi ha det bra sjølv.

På samlinga arbeidde vi med utfordringar vi såg for oss kunne oppstå ved samanslåing. Samstundes var ein oppteken av korleis ein skulle løysa dei. Prosessen i gruppa var det viktigaste. Ein vart betre kjend med kvarandre og det vart mykje humor og underhaldning om kvelden. Dersom ein treng deltakarar til revyar eller teaterlag i den nye kommunen er det berre å ta kontakt med dei tilsette i tenesta vår.

Berit Algrøy, leiande helsesøster Fjell kommune

Invitasjon til kulturforum

Sund, Fjell og Øygarden kommunar inviterer til kulturforum 2018. Målet med forumet er å utvikla samarbeid på tvers og saman med kommunen om kulturaktivitetar og arrangement i lokalmiljøet og i nye Øygarden kommune.
Kva kan vi samarbeida om og kva nytteverdi har samarbeidet?

Tema

Korleis skal vi organisera samarbeidet for å skapa gode kulturarenaer og aktivitet i nærmiljø og lokalsamfunn i heile nye Øygarden?

Dato | Tid | Stad

Onsdag 3. oktober kl. 17.30 – 19.30 på Panorama Hotel & Resort i Sund.

Program

Dørene opnar kl. 17.00 for kaffi og te, lett servering og mingling.

17.30 – 17.40 Kulturelt innslag
17.40 – 17.50 Velkomen v/kulturleiarane
17.50 – 18.05 Innlegg v/Glesnes ungdomslag
18.05 – 18.20 Utvikling av frivilligpolitikken i Sund v/Robert Kaupang Sæle
18.20 – 18.30 Pause
18.30 – 19.00 Amatørkulturrådet i Bergen presenterer seg og sitt arbeid Kven er med, kva driver dei med, kva oppnår dei i samarbeid med kvarandre og med kommunen?
19.00 – 19.20 Diskusjon rundt borda: Kva kan nytte vera for oss i vest med
eit amatørkulturråd?
19.20 – 19.25 Gruppene deler tankar høgt om kva prosess ein ynskjer
19.25 – 19.30 Avslutning

Her kan du sjå plakat for arrangementet.

Påmelding

På e-post til: laila.klemetsaune@sund.kommune.no
Frist for påmelding er fredag 21. september.

Vel møtt!

Lyser ut stillinga som rådmann for Nye Øygarden kommune

I dag vert stillinga som rådmann for Nye Øygarden kommune lyst ut. Den som vert tilsett, går i første omgang inn som prosjektleiar og vert permanent rådmann i den nye kommunen frå januar 2020.

I annonseteksten står det at det vert søkt etter ein tydeleg, drivande og samlande leiar som har evne til å byggja tillit og få til god samhandling med politisk leiing og tilsette/tillitsvalde i kommunen.

Søknadsfristen er 12. september.

Sjå stillingsannonse her.

Her finn du utlysinga med søknadsskjema.

Her oppsummerer Børge Haugetun møtet i fellesnemnda

Det handla mellom anna om politisk og administrativ organisering, eigarskapsmodellar og lokalisering av ny vidaregåande skule då fellesnemnda for Nye Øygarden kommune på måndag hadde sitt siste møte dette halvåret.

– Det var eit langt møte med tunge saker. Debatten var god sjølv om vi ikkje var samstemt i alle sakene, seier leiar av fellesnemnda, Børge Haugetun.

Her er opptak frå heile møtet i fellesnemnda.

Video/redigering: Jøran Ingvaldsen

Samordning av adressesystem i Nye Øygarden kommune – endring av adressenamn

I samband med samanslåing av Sund-, Fjell- og Øygarden kommunar må adressesystemet samordnast for å få eit eintydig adressesystem i Nye Øygarden kommune. På bakgrunn av dette føreslår prosjektrådmannen at totalt 64 adressenamn vert endra. Saka er behandla i fellesnemnda 18. juni 2018.

Lovverket er tydeleg når det gjeld tildeling av adresser. Her står det klart at adressesystema skal samordnast ved samanslåing, og at adressenamn skal være eintydig i kommunen.

Eit eintydig adressesystem er ein viktig føresetnad for at ei rekkje av tenestene som kommunen og andre aktørar skal yte vert leverte på ein tilfredstillande måte. Det viktigaste er at naudetatane/utrykkingskøyretøy skal finne raskt fram. Verdifulle minutt og i verste fall kan liv gå tapt dersom det er tvil om ei adresse.

Arbeidet med å endre adressenamn er omfattande og krevjande, og det kan vere vanskeleg å ta stilling til kva for adressenamn som bør endrast og kva som skal bestå. Fellesnemnda for Nye Øygarden kommune har i dette arbeidet vektlagt fylgjande kriterium:

  • Prioritere vegar/adresseparsellar med mange adresseeiningar, slik at færrast mogleg må endre adresse.
  • Prioritering av adressenamn med tilknyting til gamle gardsnamn og/eller stadnamn, og veletablerte namn som mange har sterk/lang tilknyting til.
  • Prioritering av namn som vert ofte brukt av mange, t.d. adressenamn knytt til stader med næringsverksemd og/eller offentleg verksemd.
  • Prioritering av adressenamn som høyrer saman (nordre, søre osv.)
  • Prioritere å slette små/korte vegparsellar med eige adressenamn som enkelt kan endrast/ omadresserast til tilstøytande veg.

Første steg i arbeidet med å samordne adressesystema er å vedta kva adressenamn som skal endrast. Etter vedtak i fellesnemda vil det bli starta prosess med å tildele nye adressenamn på vegane som må endre namn. I dette arbeidet ønskjer kommunen innspel/forslag frå aktuelle lag, organisasjonar og grunneigarar i adresseringsområdet, til nye adressenamn. Eige brev med informasjon vert sendt til huseigarar i dei aktuelle vegane.

Når nye namn er vedtekne vert dei førte i matrikkelen og distribuert vidare til folkeregisteret, bankar, forsikringsselskap og andre store adressebrukarar. Du må sjølv informere andre som treng å kjenne til adressa di, og huseigarar har plikt til å informere eventuelle leigetakarar.

Adressenamn- og tilvisingsskilt vert sett opp samstundes med at adressenamnet formelt vert endra, og de vil få utlevert nytt husnummerskilt (standard type) dersom også husnummeret må endrast.

Kontaktinformasjon

Vis til kva sak det gjeld ved kontakt med kommunen; opplys om vegnamn/vegkode og gnr/bnr.

Fjell kommune

Telefon 55 09 60 00, e-post: postmottak@fjell.kommune.no
Postadresse: Fjell kommune, Postboks 184, 5342 Straume

Sund kommune

Telefon 56 32 75 00, e-post: postmottak@sund.kommune.no
Postadresse: Sund kommune, Postboks 23, 5371 Skogsvåg

Øygarden kommune

Telefon 56 38 20 00, e-post: postmottak@oygarden.kommune.no
Postadresse: Øygarden kommune , Ternholmvegen 2, 5337 Rong

Adressenamna som skal endrast

I samband med samordning av adressesystemet i Nye Øygarden kommune er det vedteke, i sak 47/18, at desse adressenamna skal endrast:

Fjell kommune

Adressenamn Stad
Austrevegen Vindenes/Barneshaugen
Bergtun Søre Ekrhovda
Dalen Turøyna
Dalavegen Algrøyna
Fagrebakken Snekkevika
Fagredalvegen Skålvika
Garen Turøyna
Hagardsvegen Ågotnes
Haugarvegen Algrøyna
Haugen Straume
Hellemyrvegen Bjorøyna
Kvednaviksvegen Misje
Linhaugen Lokøyna
Lynghaugen Brattholmen
Myro Turøyna
Rognevegen Straume
Sanden Landro
Sletto Li
Storsteinsvegen Fjell
Varden Misje
Vestrevegen Vindenes/Barneshaugen

Sund kommune

Adressenamn Stad
Bergvegen Hammarsland
Brøta Hammarsland
Gjerde Øvretveit
Gjerdevegen Vorland
Haugaseto Kårevika
Krekebærvarden Glesnes
Kvednavegen Vorland
Kverndalen Lerøyna
Liavegen Sund prestegard
Myravegen Kausland
Neset Skoge
Nordavika Sund prestegard
Porsvegen Forland
Porsneset Forland
Rindane Kleppe
Sjøvegen Eide
Storhaugen Skaga
Stølen Sund prestegard
Vardevegen Kausland
Vågsbotn Forland

Øygarden kommune

Adressenamn Stad
Berget Blomvåg (Måken)
Gjerdet Nordre Sæle
Haugevegen Hernar
Ingjervegen Vik
Knappen Hellesøy
Kvernneset Torsvik
Kyrkjevegen Blomvåg
Murane Hernar
Nesvegen Nautnes
Nesevegen Torsvik
Nygardsvegen Rong
Rinden Breivik
Sjøvegen Vik
Skaret Hernar
Storevarden Rong
Storhøyen Hellesøy
Sælevegen Nordre Sæle
Sæløyvegen Sæløy
Tjødnarvegen Rong
Torvvikvegen Torsvik
Varden Oen
Vågevegen Torsvik
Sørheimsvegen Alvheim

Kommunestyra skal gje uttale til politisk styringsstruktur

På møtet i fellesnemnda i dag vart det vedteke å leggja sluttrapport for politisk styringsstruktur ut på høyring til kommunestyra i Sund, Fjell og Øygarden. Det må setjast ein frist som gjer det mogleg å rekkja tilbake med sak til fellesnemnda den 18. juni.

Frå møtet i fellesnemnda i dag.

I vedtaket heiter det også at før saka vert sendt ut på høyring, må det leggjast ved ei oversikt over fordelar og ulemper ved fire utval, tre eller to utval.

Elles legg fellesnemnda til grunn ein politisk organisasjonsmodell med formannskap, to hovudutval og kontrollutval. Fire medlemer røsta for å leggja tre hovudutval til grunn for den politiske organiseringa. Fellesnemnda vil ta endeleg stilling til saka når ho har vore på høyring

I intensjonsavtalen, vedteken i juni 2017,  er det lagt til grunn at det skal vera fire hovudutval, medan utval for politisk styringsstruktur no føreslår at den nye kommunen skal ha to hovudutval. På bakgrunn av dette føreslo leiar i fellesnemnda, Kari-Anne Landro, at saka må på høyring til kommunestyret fordi innstillinga frå utvalet er ei endring i forhold til vedtaket/mandatet frå kommunestyra.

Forslag til eigarstruktur

Etter ein lengre debatt, vedtok fellesnemnda å leggja sluttrapport for utval for eigarskapsmodellar til grunn for organisering av eigarskap i Nye Øygarden kommune. Etter fellesnemnda si første behandling vert rapporten sendt ut på høyring til dei som er nemnd i saksutgreiinga og i tillegg dei tre kommunestyra. Høyringsfristen vert sett til 23. mai, og fellesnemnda sluttbehandlar saka og rapporten i møtet den 18. juni.

Det vart vidare vedteke å be prosjektrådmannen å leggja fram eit forslag til prioritering av kva kva tenesteområde ein må starta prosessen først med, også knytt til juridiske vurderingar, og at dei enkelte kommunestyra eventuelt må gjera eigne vedtak om oppløysing eller liknande.

I tillegg vart det lagt til ein protokolltilførsel frå Marianne Sandahl Bjorøy på vegner av representantane frå Arbeiderpartiet som gjeld deira synspunkt på nokre enkelte punkt knytt til organisering av tenestene/områda som er omtalt i rapporten.

I sluttrapporten frå utvalet er det føreslått at ØyVAR AS vert eit nytt selskap for å samla alle VAR-tenestene (VAR: vatn, avlaup og renovasjon). Dersom BIR AS skal utføra renovasjonsløysingar, vert det det etablert eit selskap med namnet ØyVA AS (utan renovasjon. I rapporten er det vidare føreslått å etablera Øygarden næringseigedom AS. Dette selskapet skal arbeida med aktiv utvikling av næringseigedomar for å fremja strategiske og økonomiske mål på vegner av kommunen.

Forvaltning og drift av eigne bygg og anlegg føreslår utvalet å samla i eit eige føretak med namnet Øygarden eigedomsforvaltning KF. Det er også føreslått å etablera eit næringsutviklingsselskap med namnet Øygarden næring- og utvikling AS. Brann- og redningstenesta er føreslått teke inn i eit nytt kommunalt føretak, alternativt i kommunal etat saman med andre tenester.

Lokaldemokrati og identitet

Også i saka om lokaldemokrati og identitet – rammebudsjett for tiltak og
arrangement var det mange som tok ordet. Arbeidsgruppa for lokaldemokrati har lagt fram tiltakspakke og milepelsplan for fellesnemnda saman med budsjett som peikar tilbake på dei enkelte tiltaka.  Budsjettet har ei samla ramme på 1,5 millionar kroner for 2018 og 2019. Saka vart lagt fram utan innstilling.

Fellesnemnda vedtok å slutta seg til prosjekt og aktivitetar slik det er skissert i saka med nokre korrigeringar og føringar. Dette gjeld at kyrkja må involverast, bygdevandring som tillegg til Kystpass, Fjell festning light festival og andre samlande eksisterande arrangement må vurderast.

Fellesnemnda slutta seg til rammebudsjettet slik det er skissert for 2018, unntatt den posten som gjeld marknadsføring, kommunikasjon og profilering (inklusive bruk av logo). Prosjektrådmann kjem tilbake til denne posten i junimøtet. Budsjettet for 2019 må sjåast i samanheng med heile budsjettprosessen for fellesnemnda for 2019. Ein ber spesielt om at løyvingar til MOT-festival vert avklart snarast sett opp mot løyvingar som er gitt i kvar enkelt kommune.

Fellesnemnda ber om at det i august 2018 vert presentert ny status for prosjektet.

Overtar av ansvaret for tannhelsetenesta?

Fellesnemnda er positiv til å delta i Helse- og omsorgsdepartementet si prøveordning der kommunen overtek ansvaret for den offentlege tannhelsetenesta i dei tre kommunane. Ei eventuell overtaking av dette ansvaret vil i tilfelle ha verknad frå januar 2020. Fjell kommune har allereie inngått ein intensjonsavtale med Hordaland fylkeskommune om leige av areal i lokalmedisinsk senter på Straume. Saka vert vidaresendt til dei kommunestyra til orientering.

Rune Lid vert prosjektrådmann

Fellesnemnda vedtok at Rune Lid vert prosjektrådmann for Nye Øygarden kommune fram til utgangen av 2018. Det er leiargruppa, samansett av dei tre ordførarane i Sund, Fjell og Øygarden, som i samråd med rådmennene har utarbeidd ei mellombels løysing for prosjektstyringa av Nye Øygarden kommune.

Etter at prosjektleiar Paul J. Manger slutta i stillinga som prosjektleiinga like før påske, har leiargruppa arbeidd med korleis prosjektorganisasjonen skal styrast heretter.

Vedtaket på møtet på måndag inneber at rådmennene i dei tre kommunane skal ha ei særskilt rolle i styringa av prosjektet fram til utgangen av 2018. Rune Lid er spurt og har sagt seg villig til å vera prosjektrådmann ut dette året inntil ny rådmann for den nye kommunen er tilsett. Rune Lid får tilbod om stillinga tilsvarande assisterande rådmann frå og med 1. januar 2020.

Prosjektrådmann Rune Lid

Prosess for ny rådmann

Fellesnemnda vedtok at det vert sett i gang ein intern tilsetjingsprosess med delkjøp av ekstern konsulenthjelp for rådgjeving i arbeidet med å tilsetja rådmann for Nye Øygarden kommune. Dei tre ordførarane får fullmakt til å gjennomføra prosessen med tilsetjing av rådmann. Det vert etablert eit tilsetjingsutval samansett av sju personar. Arbeidsgjevarsida er samansett av dei tre ordførarane i tillegg til Odd Bjarne Skogestad. Utvalet er vidare sett saman av tre tillitsvalde, eín frå kvar kommune, valde av og blant dei tilsette.

I saksutgreiinga går det fram at utlysingstekst må vera ferdig i løpet av juni månad slik at utlysinga kan annonserast like etter sommarferien (august).  Det vert teke sikte på å tilsetja ny rådmann innan 1. oktober slik at den nye rådmannen kan vera på plass frå 1. januar 2019.
Fellesnemnda får tilbake ei drøftingssak i junimøtet som skildrar val av rådgjevande ressurs, korleis ein skal nytta administrativ ressurs, stillingsprofil, prinsipp for kompensasjon og vurdering knytt til fast stilling versus åremål.

Orientering

Etter saka om tilsetjing av rådmann, orienterte den nytilsette prosjektrådmannen Rune Lid om prosjektstrukturen der han og dei to andre rådmennene har definert ei styringsgruppe der rådmannsgruppa, delprosjektleiarar og tillitsvalde skal delta. Han har ambisjon om å leggja fram hovudstruktur for administrativ organisering i juni og håpar å ha på plass kommunalsjefar/kommunaldirektørar på seinsommaren/tidleg haust.

Tekst: Vigleik Brekke
Foto: Monica Hovland

Omstillingsavtale klar for sluttbehandling

Partssamansett utval (PSU) skal på møtet den 17. april ta endeleg stilling til framlegget til omstillingsavtale.


Den 22. mars behandla PSU framlegget til omstillingsavtale for første gong. På møtet vart det fremja fleire endringsforslag som vart vedtekne skulle innarbeidast i avtalen før endeleg godkjenning.

No ligg den omarbeidde omstillingsavtalen klar til sluttbehandling. Det er føreslått at PSU vedtek omstillingsavtalen. Avtalen gjeld frå avtalen er underskriven og ut omstillingsperioden. Avtalen gjeld då berre saker som har vore sak i omstillingsperioden fram til utgangen av 2019. I framlegget til vedtak heiter det vidare at Når Nye Øygarden kommune er etablert som eige rettssubjekt januar 2020, trer den nye kommunen inn i denne avtalen.

Omstillingsavtalen regulerer arbeidsgjevarpolitiske spørsmål og utfordringar i samanslåingsprosessen fram til nytt kommunestyre er konstituert i den nye kommunen.  Avtalen legg til grunn at kommunesamanslåinga inneber verksemdsoverdraging etter arbeidsmiljølova der alle dei tilsette vert overførte til Nye Øygarden kommune frå 1. januar 2020.

Alle tilsette i Sund, Fjell og Øygarden har rett på jobb i den nye kommunen og skal ikkje få reduksjon i løna si. Ein del medarbeidarar vil få nye oppgåver og arbeidsstad. Omstillingsavtalen regulerer prinsipp for plassering av leiarar og tilsette. Ved einingar som vidareført utan vesentlege endringar inn i ny kommune, vert noverande leiar i stillinga si i den nye kommunen.

Møtet i PSU vert halde på Skjenet 2 og tek til klokka 09.00.

Her kan du lesa innkalling med saksdokument.

Tekst: Vigleik Brekke